بھارت ارون بھارتی ٹیم کے بولنگ اور سنجے بنگراسسٹنٹ کوچ مقرر

ممبئی: بھارت کے نئے کوچ روی شاستری کو اپنی پرانی سپورٹ ٹیم واپس مل گئی تاہم بی سی سی آئی کمیٹی اور شاستری میں میٹنگ کے بعد بورڈ نے بھارت ارون کو بولنگ کوچ اور سنجے بنگر کو اسسٹنٹ کوچ مقرر کرنے کا اعلان کردیا۔
شاستری جب ٹیم ڈائریکٹر تھے تب بھی یہ دونوں اور فیلڈنگ کوچ سری دھر ان کے ساتھ کام کرتے تھے، اب وہ ایک بار پھر اسی ٹیم کے ساتھ کام کریں گے، بنگر اور ارون کو بھی 2،2 برس کیلیے کوچ مقرر کیا گیا ہے۔ یاد رہے کہ شاستری نے ایڈوائزری کمیٹی کی جانب سے نامزد کیے جانے والے بولنگ کوچ ظہیر خان اور بیٹنگ کنسلٹنٹ راہول ڈریوڈ کو قبول کرنے سے انکار کردیا تھا، جس کے بعد ایک خصوصی کمیٹی تشکیل دی گئی تھی جس نے ان کے تمام مطالبات مان لیے ہیں، شاستری کا ظہیر خان کے بارے میں کہنا تھا کہ ضرورت پڑنے پر بطور کنسلٹنٹ ان کی خدمات بھی لی جائیں گے۔