وفاقی وزیراطلاعات مریم اورنگزیب نے کہا عمران خان ریاست کی رٹ کے ٹکڑے کر رہے ہیں، انصاف ، قانون اور عدلیہ کی پراسرار خاموشی ملک کے لیے خطرہ بنتی جارہی ہے، لاڈلے کو رعایت دےکر قانون کی بالادستی قائم نہیں ہوسکتی، یہ سلسلہ نہ رکا تو ہرگلی سے جتھے نکلیں گے اور قانون و آئین اور انصاف پر اسی طرح حملہ آور ہوں گے۔ زمان پارک میں عمران خان کے گھر آپریشن میں کلاشنکوف، پیٹرول بم اور دہشت گرد نکلے، عمران خان کے پاس اپنی چوریوں کا کوئی جواب نہیں، اس لیے وہ پورے ملک کو جلارہے ہیں، فرد جرم رکوانے کے لیے سب حربے استعمال کیےگئے۔ عمران خان اقتدار چھن جانے پر پاگل ہوچکے ہیں، وہ سیاسی دہشت گرد ہیں، اگر عمران خان کی جان کو خطرہ تھا تو کل کیا ہوا؟ کل پولیس کی گاڑیوں اور شہریوں کی موٹر سائیکلوں پر حملےکیےگئے۔ حکومت دن رات عمران خان کا ڈالا ہوا گند صاف کر رہی ہے، عمران خان ملک کو دیوالیہ کرگئے، عمران خان آئی ایم ایف سے جن شرائط کو مان کرگئے تھے ان پر دوبارہ مذاکرات ہو رہے ہیں، حکومت عوام کو ریلیف دینےکی کوشش کر رہی ہے
