چیئرمین پیپلز پارٹی بلاول بھٹو زرداری نے کہا ہے کہ لیول پلیئنگ فیلڈ کی شکایت ن لیگ سے ہے اور مجھے یقین ہے نواز شریف وطن واپس آکر اپنے کیسز کا سامنا کریں گے۔
بلاول بھٹو زرداری نے لاہور میں میڈیا سے گفتگو کرتے ہوئے کہا کہ پیپلز پارٹی کا لیول پلیئنگ فیلڈ کا مطالبہ ن لیگ سے ہے، ہونا تو یہ چاہیے تھا تمام سیاسی پارٹیاں ایک ساتھ الیکشن کا مطالبہ کرتیں، پی ڈی ایم کے سب اتحادیوں کو ساتھ لے کر چلا جاتا۔
ان کا کہنا تھا کہ( ن) لیگ نے بندوبست کیا کہ لیول پلیئنگ فیلڈ نہ ہو تو شکایت انہی کے خلاف ہوگی، کسی اور سے شکایت ہوتی تو میں اس کا نام لیتا، پی پی کے اس حوالے سے اعتراض سیاسی جماعت سے ہے۔
انہوں نے کہا کہ الیکشن کا اعلان کرنے کا اختیار نہ اسٹیبلشمنٹ کے پاس ہے نہ میرے پاس ہے، بلکہ الیکشن کمیشن کے پاس ہے، الیکشن کی تاریخ کا فوری طور پر اعلان ہونا چاہیے۔
صرف عمران خان کو بند کرنے سے مسائل حل نہیں ہوئے،بلاول
ان کا کہنا تھا کہ ترقیاتی فنڈز کے منصوبوں پر قانون واضح ہے کہ منظور شدہ منصوبے جاری رہنے چاہئیں، اگر صرف 90 دن کےلیے روکنے کی بات ہوتی تو مسئلہ نہ تھا لیکن ہمیں تو الیکشن کی تاریخ ہی نظر نہیں آرہی کہ انتخابات کب ہیں تو اس لیے مسئلہ ہے۔
بلاول بھٹو نے کہا کہ ایسا نہیں ہوسکتا کہ سندھ کی بجٹ والی اسکیم کو اجازت نہ دیں مگر وفاق اور دوسرے صوبے میں اسکیمیں جاری رہیں بلکہ وہاں تو مزیدار اسکیمز شروع کی جارہی ہیں کہ ججز کو بلاسود قرضہ دیے جائیں، یا تو پنجاب سمیت کسی بھی صوبے میں اسکیم نہ ہو یا پھر سب کو اجازت ہونی چاہیے، روایت سب کیلئے ایک ہونی چاہئے۔
