عوامی نیشنل پارٹی کے سربراہ اسفندیار ولی خان نے پی ٹی آئی پر پابندی کے حکومتی فیصلے کو جزباتی قرار دے دیا۔
اسفند یار ولی خان نے کہا کہ حکومت کی جانب سے پی ٹی آئی پر پابندی کا فیصلہ جذباتی ہے، جذبات پر مبنی فیصلوں کے نتائج کسی بھی صورت سود مند نہیں ہوتے۔
انہوں نے کہا: ہم نے ماضی میں ایسے جذباتی فیصلوں کے منفی نتائج دیکھے ہیں۔
رہنما عوامی نیشنل پارٹی نے کہا کہ ماضی کے ان غلط فیصلوں کے اثرات آج بھی سیاست میں نظر آتے ہیں اور ذاتی خواہشات اور جذبات پر قابو پانا ہی سیاست میں اصل امتحان ہے۔
انہوں نے کہا کہ حکومت کا پی ٹی آئی پر پابندی کا فیصلہ غیر منطقی اور سمجھ سے بالاتر ہے ، نیشنل عوامی پارٹی پر پابندی کی صورت میں ہم ان فیصلوں کا سامنا کر چکے ہیں۔
اسفند یار ولی خان نے کہا کہ اصل احتساب ان کا ہونا چاہئے جو مصنوعی سیاسی قوتوں کو بنانے کے ذمہ دار ہیں، سیاسی جماعتوں کو ایک دوسرے کے خلاف استعمال ہونے کی روش بند کرنی ہوگی۔
انہوں نے کہا کہ مسائل سے نکلنا ہے تو جمہوری اصولوں پر کھڑے ہوکر پارلیمان کو بالادست بنانا ہوگا، تمام ادارے آئینی دائرہ اختیار تک محدود ہوں گے تو مسائل کا حل ممکن ہے۔
