بیرون ملک سیاسی پناہ کے خواہشمند افراد کیلئے پاکستانی پاسپورٹ کا اجرا معطل کرنے کے فیصلے کو واپس لے لیا گیا ہے۔
نائب وزیراعظم اور وفاقی وزیر خارجہ محمد اسحاق ڈار کی زیر صدارت اجلاس ہوا کہ جس میں اوورسیز پاکستانیوں کی فلاح و بہبود سے متعلق متعدد اہم امور زیر غور لائے گئے۔
وفاقی وزیر خارجہ محمد اسحاق ڈار کی زیر صدارت ہونیوالے اجلاس میں سیکرٹری خارجہ، سیکرٹری داخلہ، حکام وزارت خارجہ اور دیگر شریک ہوئے۔
نائب وزیراعظم کو بیرون ملک میں مقیم پاکستانیوں کو بروقت پاسپورٹ اجرا کی سہولت پر بریفنگ بھی دی گئی ہے۔
بریفنگ میں بتایا گیا کہ اوور سیز پاکستانیوں کے پاسپورٹ کا اجرا 60 دن کے اندر اندر کردیا جائے گا۔
بیرون ملک سیاسی پناہ کے خواہشمند افراد کیلئے پاکستانی پاسپورٹ کا اجرا معطل کرنے کا فیصلہ واپس لے لیا گیا ہے، واضح رہے کہ سیاسی پناہ کے شوقین افراد کو پاکستانی پاسپورٹ کا اجرا معطل کرنے کے احکامات 5 جون 2024 کو جاری کیے گئے تھے۔
