رہنما پی ٹی آئی خدیجہ شاہ نے مخصوص نشست پر رکن اسمبلی بننے پر امریکی شہریت چھوڑنے کا اعلان کردیا ہے۔
لاہور، رہنما پی ٹی آئی اور مشہور فیشن ڈیزائنر خدیجہ شاہ نے پی ٹی آئی کی مخصوص نشست پر رکن قومی اسمبلی بننے کیلئے امریکی شہریت چھوڑنے کا باضابطہ اعلان کردیا ہے۔
خدیجہ شاہ نے انسٹاگرام پر اپنے پیغام میں کہا کہ میرے رہنما اور زندگی کے ہیرو عمران خان نے مجھے اس قابل سمجھا کہ اسمبلی میں پی ٹی آئی کی نمائندگی کرسکوں اور بانی پی ٹی آئی کے ویژن کو آگے بڑھا سکوں، لہذا میں اس پیشکش کو قبول کرتی ہوں۔
نامزد رکن اسمبلی نے مزید کہا کہ جب تک میری دوہری شہریت کا مسئلہ حل نہیں ہوجاتا اس وقت تک مہر النساء کو اپنا نمائندہ مقرر کرتی ہوں، میں نے بہت سوچ سمجھ کر انہیں اپنا نمائندہ مقرر کیا ہے وہ آکسفورڈ کی پڑھی لکھی ہیں۔
یاد رہے خدیجہ شاہ 9 مئی کے واقعات میں ملوث ہونے کے الزام میں جیل بھی کاٹ چکی ہیں، وہ سابق مشیر خزانہ سلمان شاہ کی صاحبزادی اور سابق چیف آف آرمی اسٹاف آصف نواز جنجوعہ کی نواسی بھی ہیں۔
