اسلام آباد، رکن قومی اسمبلی شیر افضل مروت کی پی ٹی آئی میں واپسی کی راہ ہموار ہونے لگی۔
عمران خان کی جانب سے رکن قومی اسمبلی شیر افضل مروت کی برطرفی کے نوٹیفکیشن پر نظرثانی کیلئے رضا مندی ظاہر کر دی گئی ہے۔
ذرائع کے مطابق پی ٹی آئی کے سینئر رہنماؤں کی جانب سے عمران خان سے ملاقات میں شیرافضل مروت کا معاملہ اٹھایا گیا، جس پر عمران خان نے ایک ہفتے میں فیصلہ کرنے کا کہہ دیا ہے۔
ذرائع کے مطابق عمران خان نے یقین دہانی کرائی کہ شیر افضل مروت کی برطرفی کے معاملے کا خود جائزہ لوں گا، عمران خان کا کہنا تھا کہ اگر میں مطمئن ہوا تو شیر افضل مروت کی برطرفی کا نوٹیفکیشن واپس لے لیا جائے گا۔
واضح رہے کہ گزشتہ دنوں تحریک انصاف نے شیر افضل مروت کی رکنیت معطل کرتے ہوئے انہیں پارٹی سے فارغ کر دیا تھا، تاہم شیر افضل مروت نے پارٹی کی جانب سے جاری کردہ نوٹیفکیشن کو جعلی قرار دیدیا تھا۔
