مظفرآباد( نیوز ڈیسک) وزیر اعظم آزاد کشمیر چوہدری عبدالمجید نے گزشتہ 5سال میں 2ارب روپے سے زائد کی 3سو کنال سرکاری اراضی کی کرپشن کی۔ مظفرآباد میں50کنال زمین اپنے بیٹوں کے نام جبکہ گوجرہ میں 3کروڑ روپے سے زائد کی کوٹھی بنا لی۔ وزیر اعظم نے اپنے بیٹے چوہدری قاسم کو بھی مختلف اداروں میں کرپشن کی کھلی چھٹی دے رکھی تھی۔چوہدری قاسم پر کروڑوں روپے کی کرپشن کے الزامات ہیں۔چوہدری عبدالمجید پر حالیہ کشمیر کونسل کے انتخابات میں چوہدری ذیشان سے دس کروڑ روپے لینے کا الزام بھی ہے۔ تفصیلات کے مطابق وزیر اعظم آزاد کشمیر چوہدری عبدالمجید گزشتہ5سال قبل 50کروڑ کی پراپرٹی اور بینک بیلنس کے مالک تھے جبکہ میر پور میں 3کنال ذاتی زمین تھی وزیر اعظم بننے کے بعد ساڑھے 3سو کنال جس کی مالیت اربوں روپے بتائی جاتی ہے اوربینک بیلنس بھی 30ارب روپے کے بلند سطح سے تجاوز کر گیا ہے جبکہ میر پور میں ذاتی جائیداد کی مرمت کے نام پر بھی 60لاکھ ہڑپ کر گئے میر پور میں مختلف منصوبوں کی آڑ میں 3ارب کرپشن کے الزامات بھی وزیر اعظم آزاد کشمیر پر لگائے جا رہے ہیں جبکہ کشمیر لیبریشن سیل میں11سو سے زائد جیالوں کو تنخواہوں کے نام پر نوازا گیا ہے۔ وزیر اعظم سیکرٹریٹ زکوٰ ۃ فنڈز کے منافع کے نا م پر ملنے والے کروڑوں روپے بھی ہڑپ کرگیا ہے جس پر آزاد کشمیر کے قانون نافذکرنے والے اداروں نے کارروائی شروع کی تاہم وزیر اعظم کے اختیارات استعمال کرکے معاملہ کو چند دن میں ہی دبا دیا گیا وزیر اعظم آزاد کشمیر چوہدری عبدالمجید کے بیٹے چوہدری قاسم نے منگلا ڈیم کے ٹھیکوں سمیت دیگر کمپنیوں سے کمیشن کے نام پر کروڑوں روپے ہڑپ کئے جس کا آج تک اپوزیشن احتساب کر سکی اور نہ ہی قانون نافذ کرنے والے ادارے گرفتار کر سکے ۔وزیر اعظم آزاد کشمیر پر الزامات کے حوالے سے آن لائن نے متحدہ بار وزیر اعظم آزاد کشمیر سے رابطہ کرنے کی کوشش کی جس پر وزیر اعظم موقف دینے سے قبل ہی لڑائی جھگڑے پر اتر آئے۔
تازہ ترین
