ہائی کورٹ نے اسکولوں کو گرمیوں کی چھٹیوں کی فیس وصول کرنے کی اجازت دے دی۔اسلام آباد ہائی کورٹ کے جج جسٹس میاں گل حسن اورنگزیب نے نجی تعلیمی اداروں کی جانب سے جون جولائی کی چھٹیوں کی فیس وصولی کے معاملے کی سماعت کی۔ آل پاکستان پرائیویٹ اسکولز ایسوسی ایشن کے صدر ملک ابرار عدالت کے روبرو پیش ہوئے۔ملک ابرار نے بتایا کہ جسٹس شوکت عزیز صدیقی نے اسکولوں کو جون جولائی کی فیس وصول کرنے سے روک دیا تھا، جس کے خلاف سپریم کورٹ سے رجوع کیا، عدالت عظمیٰ نے اسکولوں کا اصولی موقف تسلیم کرتے ہوئے فیس وصول کرنے کی اجازت دے دی۔ اسلام آباد ہائیکورٹ نے سپریم کورٹ کا فیصلہ برقرار رکھتے ہوئے نجی تعلیمی اداروں کو فیس وصولی کی اجازت دے دی اور کیس نمٹا دیا۔سپریم کورٹ نے فیس وصولی سے متعلق اسلام آباد ہائیکورٹ کے ایک رکنی بینچ کا فیصلہ معطل کر دیا تھا اور کیس جسٹس شوکت صدیقی کے علاوہ کسی دوسرے بینچ کے سامنے لگانے کی ہدایت دی تھی۔
تازہ ترین
