متنازعہ چارلی ایبدو میں متنازعہ خاکوں کی پھراشاعت

فرانس کے طنز ومزاح کے میگزین چارلی ایبدو نے پیغمبر اسلام کے وہ متنازعہ خاکے دوبارہ شائع کردیے ہیں جن کی وجہ سے اس کے دفتر پر پانچ سال پہلے حملہ ہوا تھا۔ اس حملے میں بارہ افراد ہلاک ہوگئے تھے، جن میں متنازعہ خاکے بنانے والا کارٹونسٹ بھی شامل تھا۔ متنازعہ خاکوں کی دوبارہ اشاعت ایسے موقع پر کی گئی ہے جب اس حملے میں ملوث دو حملہ آوروں اور ان کے ایک درجن سے زائد مبینہ سہولت کاروں کے خلاف بدھ کو مقدمے کا آغاز ہو رہا ہے۔ چارلی ایبدو میگزین کی انتظامیہ کا کہنا ہے خاکے شائع کرنے کا مقصد یہ ثابت کرنا ہے کہ وہ خوف اور دہشت کے آگے ’کبھی ہار نہیں مانیں گے‘۔