نیب زدہ سیاسی ٹولہ وزیراعظم کی اہلیت پر سوالات اٹھاتا ہے

ترجمان وزیراعظم ندیم افضل چن کا اپوزیشن کی جانب سےوزیر اعظم پر تنقید کاجواب دیتے ہوئے کہنا ہے کہ عمران خان کی اہلیت پر سوالات اٹھانے والوں کو یہ ذہن میں رکھنا چاہیے ان کی آدھی سے زیادہ پارٹی کرپشن کیسز بھگت رہی ہے، پوری اپوزیشن مل کر بھی وزیراعظم عمران خان پر ایک پیسہ کی کرپشن ثابت نہیں کر سکی۔ترجمان وزیراعظم نے کہا کہ کابینہ میں ردوبدل وزیراعظم کا اختیار ہے، عمران خان واضح الفاظ میں کہہ چکے ہیں کہ جو وزیر پرفارم نہیں کرے گا وہ اس کو تبدیل کر دیں گے، عمران خان عوام کے ووٹ کی طاقت سے وزیراعظم بنے، وزیراعظم عمران خان اس ملک کی کرپٹ اشرافیہ کے خلاف غریب آدمی کو مقدمہ لڑ رہے ہیں لہذا اس کیس میں جیت حق اور سچ کی ہوگی۔ندیم افضل چن نے کہا کہ چیئرمین پی پی پی بلاول بھٹو کی تقریر لکھنے والوں کو حقائق کو مدنظر رکھتے ہو ئے تقریر لکھنی چاہیے، بلاول کے ارد گرد نیب زدہ سیاسی ٹولہ اکٹھا ہوا ہے جو چیئرمین پی پی پی کو اپنے مفادات کی خاطر استعمال کر رہے ہیں،بلاول کو کسی پر تنقید سے پہلے ان عناصر کی کرپشن کا بھی نوٹس لینا چاہیے۔