واشنگٹن (مانیٹرنگ ڈیسک) امریکی محکمہ خارجہ نے امید ظاہر کرتے ہوئے کہا ہے کہ طالبان کے نئے امیر ملا ہیبت اللہ اخونزادہ مذاکرات کا راستہ اختیار کریں گے۔واشنگٹن میں میڈیا بریفنگ کے دوران امریکی محکمہ خارجہ کے معاون ترجمان مارک ٹونر نے کہا کہ افغان طالبان کے نئے امیر ملا ہیبت اللہ کے پاس ایک موقع ہے کہ وہ امن کی راہ اختیار کریں اور مذاکرات کے ذریعے حل کی جانب بڑھنے کی کوشش کریں۔ بیان میں مزید کہا گیا ہے کہ ”امید ہے طالبان کے نئے امیر مذاکرات کا راستہ اختیار کریں گے۔ “دوسری جانب ملا ہیبت اللہ نے اپنے پہلے آدیو پیغام میں مذاکراتی عمل کو مسترد کرتے ہوئے کہا ہے کہ جو خود کو افغان کہتا ہو اور اس کے ساتھ مسلمان، مہاجر اور مجاہد بھی کہتا ہو تو وہ کبھی کفار کے سامنے سر نہیں جھکائے گا، ہم اپنی جان قربان کر دیں گے مگر سر نہیں جھکائیں گے۔پیغام میں مزید کہا گیا ہے کہ ملا منصور اختر کا خون ضرور رنگ لائے گا اور طالبان کو فتح نصیب ہو گی، ہم اپنے اسلاف کا غم جنگ میں استعمال کریں گے۔واضح رہے کہ گزشتہ روز افغان طالبان کی مرکزی شوریٰ نے ملا اختر منصور کی جگہ ملا ہیبت اللہ کو نیا امیر مقرر کیا تھا۔
تازہ ترین
