فلسطین میں جاری اسرائیلی جارحیت پر پنجاب حکومت نے طبی عملہ اور دوائیں بھیجنے کا فیصلہ کیا ہے۔
خبروں کے مطابق نگراں وزیر صحت پنجاب ڈاکٹر جاوید اکرم کا کہنا ہے کہ فلسطین میں سب سے زیادہ ضرورت میڈیکل کیئر کی ہے، طبی عملہ بھیجنے کے لیے کمیٹی قائم کردی ہے۔
انہوں نے کہا کہ غزہ میں زخمیوں کے علاج کے لیے ڈاکٹر، نرسز وہاں جائیں گے، ہمیں صرف وفاقی حکومت کے جواب کا انتظار ہے۔
ڈاکٹر جاوید اکرم کا کہنا ہے کہ فلسطینی سفیر کو طبی عملے، دوائیں بھیجنے کی پیشکش سے آگاہ کردیا ہے، کنگ ایڈورڈ میڈیکل یونیورسٹی کے زیر انتظام ادویات بینک قائم کیا جارہا ہے۔
نگراں وزیر صحت نے کہا کہ میو اسپتال میں فلسطینی شہریوں کے لیے بلڈ بینک قائم کیا جارہا ہے، ہم خود وہاں پہنچ کر زخمیوں کا علاج کریں گے۔
