بھارتی پنجاب کے شہر فریڈ کوٹ کے ایک امتحانی مرکز میں نوجوانوں کی جانب سے اپنی گرل فرینڈ کا روپ دھار کر امتحان دینے کی کوشش ناکام ہوگئی۔
یہ واقعہ 7 جنوری کو پیش آیا جس میں انگریز سنگھ نامی لڑکا اپنی گرل فرینڈ پرمجیت کور جیسا لباس اور انداز اپنا کر امتحان دینے پہنچا، انگریز سنگھ اس بات سے یقیناََ لاعلم تھا کہ وہ پکڑا جائے گا کیونکہ اس نے اپنی جانب سے پوری تیاری کر رکھی تھی لیکن امتحانی مرکز پر عملے نے اسے پکڑ لیا اور پولیس میں فوری شکایت درج کرائی۔
پولیس کے مطابق انگریز سنگھ نے اپنی کوشش کی کہ یقین کرلیا جائے کہ وہی پرمجیت ہے، اس نے فرضی ووٹر اور آدھار کارڈ کا استعمال کرکے ثابت کرنا چاہا لیکن ناکام رہا۔
شاید وہ پولیس کو دھوکا دینے میں کامیاب بھی ہو جاتا لیکن بائیومیٹرک سسٹم سے مار کھا گیا، اس کی انگلیوں کے نشانات بائیومیٹرک ڈیوائس پر حقیقی امیدوار سے میچ نہیں کیے، انگریز کو حراست میں لے کر اس سمیت مجیت کور کیخلاف بھی کارروائی کا آغاز کر دیا گیا ہے۔