صوبہ خیبرپختونخوا کے دارالحکومت پشاور میں بارشوں کے بعد نالے ابل پڑے اور کئی نشیبی علاقے زیر آب آگئے۔
پشاور میں وقفے وقفے سے موسلادھار بارش کا سلسلہ جاری ہے، چارسدہ روڈ، بڈھنی اور وارسک روڈ پر پانی گھروں میں داخل ہوگیا جسکے باعث شہری گھروں میں محصور ہوگئے۔
ریسکیو حکام کے مطابق گھروں میں محصور افراد کو محفوظ مقام پر منتقل کردیا گیا ہے اور یہ سلسلہ جاری و ساری ہے۔
محکمہ موسمیات کے مطابق اگلے 15 دنوں میں بھی بارشوں کی پیش گوئی کی گئی ہے، انتظامیہ کے مطابق پی ڈی ایم اے کی ہدایات پر من و عن عمل درآمد کیا جائے اور بارشوں سے ممکنہ نقصانات کو کم سے کم کرنے کیلئے تمام انتظامات یقینی بنائے جائیں۔