عمران خان راہ فرار اختیار کرنا چاہتے ہیں، طلال چوہدری

اسلام آباد (مانیٹرنگ ڈیسک) مسلم لیگ (ن) کے طلال چودھری نے کہا ہے کہ عمران خان عدالت میں کوئی ثبوت فراہم نہ کر سکے وہ جوڈیشل کمیشن میں کیا ثابت کر سکیں گے اسی لیے راہ فرار اختیار کر رہے ہیں۔ طلال چوہدری پاکستان تحریک انصاف کے سربراہ کے بیان پر تبصرہ کر رہے تھے جس میں عمران خان نے پانامہ کیس پر جوڈیشل کمیشن کے قیام کو مسترد کردیا تھا۔ رکن قومی اسمبلی طلال چوہدری نے عمران خان کو سخت تنقید کا نشانہ بناتے ہوئے کہا کہ تحریک انصاف کے پاس الزامات کے سوا کچھ نہیں ہے وہ عدالت کے سامنے کوئی ثبوت پیش نہیں کر سکے تو جوڈیشل کمیشن کے سامنے کیا شواہد لے کر آئیں گے؟ یہ لوگ صرف معززعدالت اور قوم کا قیمتی وقت برباد کرنا چاہتے ہیں۔ مسلم لیگی رہنما کا کہنا تھا کہ پانامہ کیس پر جوڈیشل کمیشن کے قیام کے حوالے سے کل لیگی وکلاء عدالت میں اپنا موقف پیش کریں گے ہم چاہتے ہیں کہ پاناما کیس کا فیصلہ جلد از جلد ہو جس کے لیے معزز عدالت روزانہ کی بنیاد پر سماعت کرے تو خوشی ہو گی۔ انہوں نے کہا کہ سپریم کورٹ پر مکمل اعتماد ہے یہی وجہ ہے کہ میاں محمد نواز شریف نے خود پہل کرتے ہوئے سب سے پہلے سپریم کورٹ کو تحقیقات کے لیے خط لکھا تھا اب سپریم کورٹ جو بھی فیصلہ کرے گی ہمیں قبول ہوگا۔