اسلام آباد(آن لائن ) وزیر اعظم شاہد خاقان عباسی نے کہا ہے کہ اب پاک چین اقتصادی راہداری کے تحت ملک بھر میں جاری منصوبوں کو پہلے سے بھی زیادہ تیزی سے مکمل کیا جائیگا، وزیر اعظم بدل سکتا ہے لیکن ہماری پالیسیاں برقرار رہیں گی۔ نئی کابینہ کے حوالے سے مشاورت جاری ہے آئندہ ایک یا دو دن میں وفاقی کابینہ حلف اٹھا لے گی، وفاقی کابینہ میں کون کون شامل ہوگا اس حوالے سے فیصلے کا انتظار کریں، نئی وفاقی کابینہ کے حلف اٹھانے کے بعد ہی محمد نوا ز شریف لاہور جائیں گے۔مری میں سابق وزیراعظم محمد نوازشریف اور وزیراعلیٰ پنجاب میاں شہباز شریف سے نئی وفاقی کابینہ کی تشکیل سے متعلق طویل مشاورت کے بعد میڈیا سے بات چیت کرتے ہوئے وزیر اعظم شاہد خاقان عباسی نے کہا کہ نئی کابینہ کے حوالے سے مشاورت جاری ہے آئندہ ایک یا دو دن میں وفاقی کابینہ حلف اٹھا لے گی، وفاقی کابینہ میں کون کون شامل ہوگا اس حوالے سے پرچہ آوٹ ہونے کا انتظار کریں۔ چوہدری نثارکی وفاقی کابینہ میں شمولیت کے حوالے سے سوال پر انہوں نے کہا کہ مشاورت جاری ہے، ان کی شمولیت کا فیصلہ ان کی مرضی کے مطابق ہوگا۔ انہوں نے کہا کہ کہ4دنوں میں کامیابی کے ساتھ جمہوری عمل مکمل ہونے اور مسلم لیگ(ن) کے امیدوار کو بھاری اکثریت سے کامیاب بنانے پر سب کا شکریہ ادا کرتا ہوں، انشاء اللہ حلقہ این اے120میں بھی فتح مسلم لیگ (ن) کا مقدر بنے گی، انہوں نے کہا کہ سابق وزیر اعظم نواز شریف کابینہ کے اعلان اور حلف برداری کے بعد ہی لاہور جائیں گے۔ انہوں نے کہا کہ محمد نواز شریف نے ہدایت دی ہے کہ ملک بھرمیں جاری منصوبوں کو اب پہلے سے بھی زیادہ تیز رفتاری سے مکمل کیاجائے کیونکہ ہم دنیا کو یہ پیغام دینا چاہتے ہیں کہ وزیراعظم تو تبدیل ہوگیاہے لیکن پالیسی تبدیل نہیں ہوئی۔ایک سوال کے جواب میں کہ آپ پروٹوکول پر یقین نہیں رکھتے تو اب وزیراعظم کی حیثیت سے پروٹوکول لینگے جس پر انہوں نے کہا کہ یہ پروٹوکول نہیں سیکیورٹی ہے۔
تازہ ترین
