رینجرز اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے عزیز آباد سے ٹارگٹ کلنگ، اسٹریٹ کرائمز اور ڈکیتی کی وارداتوں میں ملوث فیضان عرف بھوری گروپ کا رکن زوہان سانول کو گرفتار کرلیا۔
ترجمان رینجرز کے مطابق ملزم 800 سے زائد وارداتوں میں ملوث ہے، ملزم کراچی کے علاقے جمشید روڈ، طارق روڈ، گلشن اقبال، صدر، کالا پل اور دیگرعلاقوں میں وارداتیں کرتا تھا۔
ملزم نے دوران تفتیش 10 افراد کو قتل کرنے کا اعتراف بھی کیا، ملزم نے اپنے دیگر ساتھیوں کے بارے بھی انکشاف کیا ہے جن کی گرفتاری کیلئے چھاپے مارے جارہے ہیں۔
ملزم کے قبضے سے ڈکیتیوں میں استعمال ہونے والا 9 ایم ایم پسٹل، 2 عدد چھینی ہوئی موٹر سائیکلیں اور موبائل فونز بھی برآمد کرلیے گئے۔
