پاکستان پیپلز پارٹی کے چیئرمین بلاول بھٹو زرداری کا کہنا ہے کہ اگر ایک شخص کو چوتھی بار مسلط کیا گیا تو عوام نقصان اٹھائیں گے۔
نوڈیرو میں تقریب سے خطاب کرتے ہوئے بلاول بھٹو کا کہنا تھا کہ پیپلزپارٹی جمہوریت پر یقین رکھتی ہے، سازش کی جارہی تھی کہ ایک بار پھر ون یونٹ قائم کیا جائے، ہم نے مل کر اس سازش کا ناکام بنایا، امیر المومنین بننے کی سازشوں کو بھی ناکام کیا، پیپلزپارٹی نے ان تمام قوتوں کا مقابلہ کیا جو عوام کے حق پر ڈاکہ مارنا چاہتی تھیں۔
آپ نے میری آواز اور نمائندہ بن گھر گھر پہنچنا ہے، میرا پیغام اور منشور پہنچانا ہے، پی پی کو کامیاب کرانا ہے تاکہ ایسی حکومت بنائیں جو عوام کو حکومت ہو۔
پی پی چیئر مین نے کہا کہ ایک معاشی بحران تو دوسری طرف سیاسی بحران ہے، افغانستان کے حالات کے اثرات پاکستان کے عوام بھگت رہے ہیں، کسی کو کوئی احساس اور فکر نہیں عوام کتنی تکلیف میں ہیں، انکو اندازہ نہیں کہ اسلام آباد میں کیے گئے فیصلوں کا اثر کیا ہوتا ہے، ان فیصلوں کی وجہ سے پاکستان میں تاریخی مہنگائی، بے روزگاری اور غربت ہے۔
