لاہور، وزیراعلیٰ پنجاب مریم نواز کے پتنگ اڑانے والوں کیخلاف سخت کارروائی کے احکامات پولیس اہلکاروں نے ہوا میں اڑا دیے۔
شہریوں کو پتنگ بازی سے روکنے کے بجائے پنجاب پولیس اہلکار خود ہی پتنگ اڑانے لگے، جسکی ویڈیو بھی سامنے آگئی۔
سوشل میڈیا پر سامنے آنے والی ویڈیو میں پنجاب پولیس کی وردی پہنے اہلکاروں کو پتنگ اڑاتے ہوئے دیکھا جاسکتا ہے، دوسری جانب سی پی او فیصل آباد کا کہنا ہے کہ پولیس اہلکاروں کی پتنگ اڑانے کی ویڈیو کچھ دن پہلے کی ہے تاہم انہیں معطل کردیا گیا ہے۔
واضح رہے کہ چند روز قبل فیصل آباد کے ڈجکوٹ روڈ پر موٹر سائیکل سوار آصف گلے پر پتنگ کی ڈور پھرنے سے جاں بحق ہوگیا تھا۔
