تحریک انصاف کے رہنما مونس الٰہی نے کہا ہے کہ وطن واپس آنے کو تیار ہیں لیکن انہیں اتنی گارنٹی دی جائے کہ انہیں غائب نہیں کیا جائے گا۔
غیر ملکی میڈیا کو انٹرویو میں مونس الٰہی نے کہا حلقے کی سیاست کرنیوالے سیاستدان ان تمام معاملات سے واقف ہیں، مسئلہ گرفتاری کا نہیں، جب 2011 میں ملک سے باہر تھا اس وقت بھی مجھ پر کیس بنا، میں نے واپس آکر گرفتاری دی اور عدالت سے بری ہو گیا، مسئلہ یہ ہے کہ یہاں لوگوں کو غائب کر دیا جاتا ہے۔
مونس الٰہی سے پوچھا گیا کہ انہیں کس کی گارنٹی چاہیے جس پر انہوں نے کہا کہ جو گارنٹی دینے والے ہیں انکی گارنٹی چاہیے، اس وقت پورا نظام لگا ہوا ہے کہ کسی بھی طرح مسلم لیگ ن کی حکومت بنانی ہے، میری خواہش ہے چوہدری شجاعت اور پرویز الٰہی کے درمیان معاملات ٹھیک ہوجائیں۔
