پاکستان نے ٹی 20 انٹرنیشنل کے کسی میچ میں پہلی بار سب سے زیادہ چھکے جڑ دیے ہیں۔
ڈبلن میں آئرلینڈ کے خلاف کھیلے گئے ٹی 20 میچ میں پاکستانی بیٹرز نے 15 چھکے لگائے۔
پاکستان کی جانب سے کھیلتے ہوئے فخر زمان نے 6، رضوان اور اعظم نے 4، 4 جبکہ صائم ایوب نے ایک چھکا لگایا۔
پاکستانی اننگز میں پاور پلے میں پانچ چھکے لگائے گئے، تاریخ میں صرف دوسری مرتبہ پاکستانی بیٹرز نے پاور پلے میں پانچ چھکے لگائے ہیں۔
واضح رہے کہ آئرلینڈ کے خلاف 3 میچوں کی ٹی 20 سیریز کے دوسرے میچ میں پاکستان نے آئرلینڈ کا 193 رنز کا ہدف 3 وکٹوں کے نقصان پر 16.5 اوورز میں حاصل کر لیا تھا۔
پاکستان کی جانب سے فخر زمان 40 گیندوں پر 6 چھکوں اور 6 چوکوں کی مدد سے 78 رنز بنا کر نمایاں رہے جبکہ محمد رضوان نے 46 گیندوں پر 4 چھکوں اور 6 چوکوں کی مدد سے 75 رنز سکور کئے۔
