وفاقی حکومت کیجانب سے راستوں کی بندش اور گرفتاریوں کے بعد جماعت اسلامی نے اپنی حکمت عملی تبدیل کردی ہے اور 3 مقامات پر دھرنوں کا اعلان کیا ہے۔
جماعت اسلامی کی جانب سے دھرنے کی کال پر ریڈ زون اور پنڈی سے دارالحکومت آنیوالے راستوں کو کنٹینر لگا کر بند کردیا گیا ہے، راولپنڈی میں میٹرو بس سروس بھی بند کردی گئی، بس سروس کی بندش کے باعث مسافروں کو شدید مشکلات کا سامنا ہے۔
پولیس مختلف علاقوں میں جماعت اسلامی کے کارکنان کو حراست میں لے رہی ہے لیکن اب جماعت اسلامی کی جانب سے اپنی حکمت عملی تبدیل کردی گئی ہے۔
ترجمان جماعت اسلامی کے مطابق جماعت نے اپنی حکمت علمی کو تبدیل کرتے ہوئے 3 مقامات پر دھرنوں کا فیصلہ کرلیا ہے۔
ترجمان جماعت اسلامی کا کہنا تھا کہ امیرجماعت اسلامی حافظ نعیم کی ہدایت ہے جہاں رکاوٹ ہوگی وہیں دھرنا ہوگا، وفاقی حکومت فسطائیت پر اتر آئی، تشدد اور گرفتاریوں کی مذمت کرتے ہیں اور اب تک 1150 کارکنوں کو حراست میں لیا جا چکا ہے۔
ترجمان کا یہ بھی کہنا تھا کہ امیر جماعت اسلامی کے مطابق بجلی کے بلوں کے اضافے میں کمی اور تنخواہ دار پر ٹیکس ختم کرنے تک یہ دھرنا جاری رہے گا۔
