سندھ حکومت نے سرکاری ملازمین کے لیے ہاؤسنگ سوسائٹی کے قیام کا اعلان کردیا ہے۔
سندھ کابینہ کے اجلاس میں ون اسٹاپ شاپ میں سرمایہ کاری کی بھی منظوری دی گئی ہے۔
کابینہ کے اجلاس میں وزیر اعلیٰ سندھ سید مراد علی شاہ نے اسٹیل پلانٹ کی تعمیر نو کی اہمیت پر زور دیا ہے۔
کابینہ اجلاس کے بعد صوبائی وزیر اطلاعات شرجیل میمن نے کہا کہ صوبائی حکومت نچلے درجے کے مزدوروں کو مناسب نرخوں پر زمین فراہم کرے گی۔
وزیراعلیٰ سندھ نے یہ بھی کہا کہ چین کی مدد سے سٹیل پلانٹ کی خالی جگہ پر ایکسپورٹ پروسیسنگ زون بنایا جائے گا، یہ زون صوبائی اور وفاقی حکومتیں مشترکہ طور پر بنائیں گی جس سے حاصل ہونے والی آمدنی سے سٹیل پلانٹ بنایا جائے گا۔
سندھ حکومت نے کراچی میں مزید 50 الیکٹرک بسیں چلانے اور ضلعی انتظامیہ کے علاقوں سے پراپرٹی ٹیکس وصول کرنے کے معاہدے کی بھی منظوری دی ہے اور سڑکوں پر کچرا پھینکنے والے ٹھیکیداروں کے خلاف کارروائی کرنے کا اعلان بھی کیا ہے۔
