سویڈن اور ڈنمارک کی حکومتوں نے مذہبی کتابوں کی بے حرمتی کے واقعات روکنے پر غور کا فیصلہ کیا ہے جبکہ حکومتی فیصلے کے بعد بھی سویڈن اور ڈنمارک میں آج پھر قرآن پاک کی بے حرمتی کے واقعات رونما ہوئے۔
اسلام مخالف انتہا پسندوں نے سویڈن میں پارلیمنٹ کے باہر اور ڈنمارک میں سعودی سفارت خانے کے باہر قرآن پاک کی بے حرمتی کی۔خبر ایجنسی کے مطابق دونوں ممالک میں آج قرآن پاک کی بے حرمتی کے مزید واقعات رونما ہوئے۔
خیال رہے کہ گذشتہ روز سویڈن اور ڈنمارک کی حکومتوں نے اسلامی ممالک سے کشیدگی کم کرنے کے لیے ایسے واقعات کو قانونی طور پر محدود کرنے کے طریقوں پر جائزہ لینے کا کہا تھا۔
سویڈن کے بعد ڈنمارک میں بھی قرآن پاک کی بے حرمتی
ڈینش وزیر خارجہ لارس راسموسن نے پارلیمنٹ کے خارجہ پالیسی سپیکرز سے ملاقات کے بعد کہا تھا کہ ڈنمارک اور بیرون ملک دونوں جگہوں پر ہم اس پر کام کر رہے ہیں، امید ہے کہ ہمیں جن مسائل کا سامنا ہے ان کو کم کرنے میں مدد ملے گی۔
ہم دبائو کے تحت ایسا نہیں کر رہے بلکہ یہ ہم سب کے بہترین مفاد میں ہے، ہمیں صرف بیٹھ کر اس صورتحال کے بگڑنے کا انتظار نہیں کرنا۔دوسری طرف سویڈن کے وزیر خارجہ ٹوبیاس بلسٹروم کا کہنا ہے کہ اسلامی تعاون تنظیم کے تمام 57 ممالک کو خطوط بھیجے ہیں۔
خطوط میں قرآن پاک کی بے حرمتی کے واقعات پر وضاحت اور اسلاموفوبیک کارروائیوں کی مذمت کی گئی ہے۔یاد رہے کہ سعودی عرب اور عراق کی درخواست پر اسلامی تعاون تنظیم (او آئی سی) کا غیر معمولی اجلاس بھی آج ہو رہا ہے۔