سندھی سمیت دیگر زبانوں کو قومی زبان کا درجہ دینا چاہیے،شہری اور دیہی علاقوں میں خلیج پیدا کرنے والوں کو شکست دیں گے :ڈاکٹر فاروق ستار

کراچی(مانیٹرنگ ڈیسک)متحدہ قومی موومنٹ پاکستان کے سربراہ ڈاکٹر فاروق ستار نے کہا کہ سندھ کو تمام صوبوں میں باوقار مقام دلائیں گے،سندھی سمیت دیگر زبانوں کو قومی زبان کا درجہ دینا چاہیے،شہری اور دیہی علاقوں میں خلیج پیدا کرنے والوں کو شکست دیں گے۔ تفصیلات کے مطابق ’’سندھی ٹوپی اجرک ڈے‘‘ موقع پر منعقدہ تقریب کے بعد میڈیا سے گفتگو کرتے ہوئے ڈاکٹرفاروق ستار نے سندھی سمیت دیگر زبانوں کو قومی زبان کا درجہ دینے کا مطالبہ کیا۔ انہوں نے کہا کہ امن وامان شاہ عبدالطیف بھٹائی کی دھرتی کا خاصہ ہے ، شہری اور دیہی علاقوں میں خلیج پیدا کرنے والوں کو شکست دیں گے۔فاروق ستار نے مزید کہا کہ وہ سندھ کو تمام صوبوں میں باوقار مقام دلائیں گے اورجاگیرداری اور وڈیرہ شاہی ختم کرینگے۔واضح رہے کہ متحدہ قومی موومنٹ پاکستان کے تحت پی آئی بی کالونی کراچی میں عارضی مرکز میں سندھی ٹوپی اور اجرک ڈے منایا گیا ، جس میں رہنماؤں کے علاوہ کارکنوں کی بڑی تعداد نے شرکت کی۔نوجوان نے سندھی گیت گائے جبکہ نوجوانوں نے روایتی سندھی اور بلوچی رقص کیا۔