ہالینڈ کے انسداد دہشت گردی کے محکمے نے کہا ہے کہ اتریخت شہر میں ایک نامعلوم حملہ آور نے ایک ٹرام کے علاوہ کئی دیگر مقامات پر بھی بلااشتعالل فائرنگ کی۔ ڈچ حکام نے ٹرام میں فائرنگ کے نتیجے میں ایک خاتون کی ہلاکت اور متعدد افراد کے زخمی ہونے کی تصدیق کر دی ہے۔ انسداد دہشت گردی کے ادارے کے مطابق حملہ آور مفرور ہے اور اُس کی تلاش جاری ہے۔ عام لوگوں کو گھروں میں رہنے کی ہدایت کی گئی ہے۔ اُتریخت شہر کی پولیس اور ملکی خفیہ ادارے اس واقعے کو ’ممکنہ دہشت گردی‘ قرار دے رہے ہیں۔ ڈچ وزیر اعظم مارک رُٹّے نے اس حملے پر گہری تشویش کا اظہار کیا ہے۔ اس واقعے کے بعد ملکی دارالحکومت دی ہیگ سمیت کئی شہروں میں سکیورٹی انتظامات فوری طور پر سخت تر کر دیے گئے ہیں۔