ایمنسٹی سکیم سے فائدہ اٹھانے والوں کے نام بتائے جائیں

پیپلز پارٹی کی نائب صدراور سینیٹر شیری رحمان نے وزیر اعظم پاکستان کے خطاب پر ردعمل دیتے ہوئے کہا قوم سے خطاب کرنا ہے تو پارلیمان میں آئیں، پارلیمان کا اجلاس چل رہا ہے لیکن خطاب ٹی وی پر ہو رہے ہیں، جس اسکیم پر پارلیمان کو اعتماد میں نہیں لیا گیا اس پر عوام کیسے اعتماد کریں گے، قوم کو انتظار تھا وزیراعظم پالیسی کا اعلان کریں ، لیکن وزیراعظم کے خطاب میں سوائے الزام تراشی کے کچھ نہیں تھا۔سینیٹر شیری رحمان کا کہنا تھا ایسا لگتا ہے گزشتہ ایمنسٹی کی طرح یہ ایمنسٹی بھی ناکام ہو گئی ہے، وزیراعظم بتاتے بجٹ میں عوام کو کتنا ریلیف دیا جائے گا، اس حکومت نے 10 ماہ میں کوئی معاشی ٹارگٹ حاصل نہیں کیا۔ شیری رحمان نے حکومت سے مطالبہ کیاہے کہ ایمنسٹی سکیم سے فائدہ اٹھانے والوں کے نام بتائے جائیں، معیشت چند لوگوں کو فائدہ پہنچانے کے لئے چلائی جا رہی ہے۔