نیپال کے خلاف میچ میں بابراعظم نے یونس خان کا ریکارڈ بھی توڑ ڈالا
بابراعظم نے نیپال کے خلاف ایشیا کپ کے پہلے میچ میں سینچری سکور کر کے جہاں ہاشم آملہ کا سب سے کم اننگز میں زیادہ سینچری بنانے کا ریکارڈ توڑا وہیں انہوں نے سابق کپتان یونس خان کا ریکارڈ بھی توڑ ڈالا ہے ۔
بدھ کو ایشیا کپ 2023 کے افتتاحی میچ میں پاکستان نے نیپال کو یکطرفہ مقابلے کے بعد 238 رنز سے شکست دے دی۔ملتان میں کھیلے گئے ایشیا کپ کے پہلے میچ پاکستان نے نیپال کے خلاف ٹاس جیت کر بیٹنگ کا فیصلہ کیا جس کے بعد قومی ٹیم نے کپتان بابراعظم اور افتخار احمد کی شاندار بیٹنگ کی بدولت نیپال کو 343 رنز کے پہاڑ تلے دبا دیا۔
بابراعظم نے نیپال کے خلاف ون ڈے کیرئیر کی 19 ویں سنچری سکور کی اور 151 رنز کی شاندار اننگز کھیلی جب کہ افتخار احمد نے بھی نیپالیوں کی خوب درگت بنائی اور 71 گیندوں پر 109 رنز بورڈ پر سجاکر ناقابل شکست رہے۔جواب میں مہمان ٹیم 24 ویں اوور میں 104 رنز بنا کر آوٹ ہوگئی۔
بابراعظم نے 151 رنز کی اننگز کھیلی جس کے بعد وہ ایشیا کپ ون ڈے میں سب سے زیادہ رنز بنانے والے کھلاڑیوں کی فہرست میں دوسرے نمبر پر آگئےاور یونس خان کو ایک درجہ نیچے دھکیل دیا ہے۔
پہلا نمبر بھارتی کھلاڑی ویرات کوہلی کے پاس ہے ، ان کے علاوہ تیسرے نمبر پر یونس خان ، چوتھے پر مشفیق الرحمان اور پانچویں پر شعیب ملک براجمان ہیں ۔
