دِلاوَرعلی آزَر 21.11.84 کو پاکستان کے صوبہ پنجاب میں موجود ضلع اٹک کی تحصیل حسن ابدال میں پیدا ہُوئے آپ کے والد کا نام بشیراحمد ہے جو خانیوال کے رہنے والے تھے آپ نے اپنی ابتدائی تعلیم اِسی شہر ہی سے حاصل کی اور آج کل گلشنِ اقبال کراچی میں قیام پذیر ہیں آپ کو شاعری کی تمام جملہ اصناف سے رغبت ہے مگر غزل آپ کی محبوب ترین صنفِ اظہار ہے آپ نے شاعری کا باقاعدہ آغاز بھی اِسی صنفِ بیان سے کیا علاوہ ازیں دِلاوَرعلی آزَر نعت ، منقبت اور تنقیدی مضامین بھی لکھتے ہیں۔
2013 میں دِلاوَرعلی آزَر کا پہلا مجموعہءکلام ”پانی‘‘ منصہ شہود پر آیا اور پھر 2016 میں دوسرا شعری مجموعہ’’مآخذ‘‘ کے نام سے چھپا۔ اِن دونوں کتابوںنے بہت تیزی سے اپنے قارئین کا ایک وسیع تر حلقہ بنایا اور ناقدینِ ادَب نے اِس شاعری کی انفرادیت اور گہرائی و گیرائی کے حوالے سے نہ صرف تفصیلی مضامین لکھے بلکہ اخبارات میں کالم بھی تحریر کیے جاتے رہے اِس شاعری کو موجودہ شاعری کے فقدان کے رَد میں ایک وقیع اضافہ کہا گیا اَور یہاں تک لکھا گیا کہ گُزشتہ تین دہائیوں سے کسی نوجوان شاعر کی اِتنی مکمل اور مضبوط کتابیں سامنے نہیں آئیں 2014 میں بہاولپور یونیورسٹی سے پروفیسر سیّد زوار شاہ کی نگرانی میں اِس کتاب پر ایک تحقیقی مقالہ برائے ایم اےاُردو اقبالیات بہ عنوان ” پانی مجموعہء کلام دِلاوَرعلی آزَر کا تجزیاتی مطالعہ‘‘ بھی لکھا گیا حال ہی میں جی سی یونیورسٹی فیصل آباد میں’’پانی‘‘ اور’’مآخذ‘‘ پر ایک ایم اے کا تھیسس معروف نقاد جناب طارق ہاشمی کی نگرانی میں ہُوا ہے اور اب لاہور یونیورسٹی سے ایم فل کا تھیسس بھی منظور ہُوا ہے ۔دِلاوَر علی آزَر نے اِسی دوران اِس عہد کے سب سے اہَم شاعر ظفر اقبال کی غزلیات کا ایک انتخاب بھی کیا جسے رُمیل ہاؤس آف پبلیکیشنز نے بہت اہتمام اور محبت سے چھاپا اِس کتاب میں ظفر اقبال کی 101 غزلیات شامِل ہیں اور یہ مجموعہ ظفریاب کے نام سے شائع ہُوا ہے۔
اب دِلاوَرعلی آزَر کی شاعری پر مشتمل مجموعہءغزَل ”ثریا‘‘پر کام جاری ہے جس سے ناقدینِ ادَب اور اُردو شاعری کے سنجیدہ قاری کی بہت سی توقعات وابستہ ہیں اس کے علاوہ نعت کا ایک مجموعہ ’’اُن کے حضور‘‘ بھی کم و بیش اشاعت کے مراحل میں ہے۔۔۔
انتخابِ کلام ملاحظہ کیجئے۔۔۔۔
خود سے بڑھ کر نہیں سَجِل کوئی چیز
آج کل سائے کے علاوہ بھی
پیچھا کرتی ہے مُستَقِل کوئی چیز
سانس کھینچوں تو ایسا لگتا ہے
ہے کسی چیز میں مُخل کوئی چیز
اشک کا ذائقہ بدَلتی رہی
میری آنکھوں سے مُتَصِل کوئی چیز
زخم تو جوں کا توں ہے سینے پر
ہورہی ہُوگی مُندمِل کوئی چیز
میری آنکھوں میں مُنتَشِر کوئی خواب
میرے سینے میں مُشتَعِل کوئی چیز
کون سمجھا سکا ہے دُنیا کو
جاں کوئی جنس ہے نہ دِل کوئی چیز
ہے کوئی بات پُر اَثر آزر
ہے کوئی چیز مُعتَدِل کوئی چیز
۔۔۔۔۔۔۔۔۔۔۔۔۔۔۔۔۔۔۔
یوں دیدہء خوں بار کے منظر سے اُٹھا مَیں
طوفان اُٹھا مجھ میں سَمُندَر سے اُٹھا مَیں
اُٹھنے کے لیے قصد کِیا مَیں نے بَلا کا
اب لوگ یہ کہتے ہیں مُقَدَر سے اُٹھا مَیں
پہلے تو خد و خال بنائے سرِ قرطاس
پھر اپنے خد و خال کے اندَر سے اُٹھا مَیں
اِک اور طرح مجھ پہ کھُلی چشمِ تماشا
اِک اور تجلی کے برابَر سے اُٹھا مَیں
ہے تیری مِری ذات کی یکتائی برابَر
غائب سے تُو اُبھرا تو میسّر سے اُٹھا مَیں
کیا جانے کہاں جانے کی جلدی تھی دمِ فجر
سورج سے ذرا پہلے ہی بستَر سے اُٹھا مَیں
پتھرانے لگے تھے مِرے اعصاب کوئی دم
خاموش نگاہوں کے برابَر سے اُٹھا مَیں
اِک آگ مرے جسم میں محفوظ تھی آزر
خس خانہء ظلمات کے اندَر سے اُٹھا مَیں
۔۔۔۔۔۔۔۔۔۔۔۔۔۔۔۔۔۔۔۔۔۔
عجیب رنگ عجب حال میں پڑے ہوئے ہیں
ہم اپنے عہد کے پاتال میں پڑے ہوئے ہیں
سُخن سرائی کوئی سہل کام تھوڑی ہے
یہ لوگ کس لئے جنجال میں پڑے ہوئے ہیں
اُٹھا کے ہاتھ پہ دنیا کو دیکھ سکتا ہوں
سبھی نظارے بس اِک تھال میں پڑے ہوئے ہیں
مَیں شام ہوتے ہی گردُوں پہ ڈال آتا ہوں
ستارے لپٹی ہوئی شال میں پڑے ہوئے ہیں
وہ تو کہ اپنے تئیں کر چُکا ہمیں تکمیل
یہ ہم کہ فکرِ خد و خال میں پڑے ہوئے ہیں
جہاں بھی چاہوں مَیں منظر اُٹھا کے لے جاؤں
کہ خواب دیدہء اموال میں پڑے ہوئے ہیں
تمام عکس مِری دسترس میں ہیں آزَر
یہ آئنے مِری تمثال میں پڑے ہوئے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خود میں کُھلتے ہُوئے مَنظَر سے نمودار ہُوا
وہ جزیرہ جو سَمُندَر سے نمودار ہُوا
میری تنہائی نے پیدا کیے سائے گھر میں
کوئی دیوار کوئی دَر سے نمودار ہُوا
چاروں اَطراف مِرے آئنے رکھے گئے تھے
مَیں ہی مَیں اپنے بَرابَر سے نمودار ہُوا
آج کی رات گُذاری ہے دیے نے مجھ میں
آج کا دِن مِرے اندر سے نمودار ہُوا
کیا عجب نقش ہے وہ نقش جو اِس دُنیا کے
کہیں اندَر کہیں باہَر سے نمودار ہُوا
ایک شعلے کی لپَک نور میں ڈھل کر آئی
ایک کردار بَہتر سے نمودار ہُوا
حق کی پہچان ہُوئی خلق کو آزَر اُس وقت
جب علی آپ کے بِستَر سے نمودار ہُوا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ اِک فقیر کا حجرہ ہے آ کے چلتے بنو
پڑی ہے طاق پہ دُنیا اُٹھا کے چلتے بنو
جہانِ فانی ہے مت سوچنا سکونت کا
بس اپنے نام کا سکہ بِٹھا کے چلتے بنو
اب اِس کے بعد شکاری کمان کھینچے گا
تُم اُس سے پہلے ذرا پھڑپھڑا کے چلتے بنو
ہے بھیڑ ساقیء کوثر کو دیکھنے کے لیے
سب اپنی پیاس بجھاؤ بجھا کے چلتے بنو
نہیں ہے فائدہ اب کوئی سینہ کوبی کا
بہانے آئے تھے جو خوں، بہا کے چلتے بنو
ہُوا ہُوں تلخ تو باعث بھی لازمی ہے کوئی
مَیں تُم سے اِس لیے رُوٹھا ہُوں تاکہ چلتے بنو
سجی رہے گی یونہی بزم حشر تک آزَر
تُم اپنے شعر سُناؤ سُنا کے چلتے بنو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مَخفی ہیں ابھی درہَم و دِینار ہمارے
مِٹّی سے نِکل آئیں گے اشجار ہمارے
الفاظ سے کھینچی گئی تصویرِ دُو عالم
آواز میں رکھے گئے آثار ہمارے
زنگار کِیا جاتا ہے آئینہءتخلیق
اور نقش چلے جاتے ہیں بے کار ہمارے
کچھ زخم دِکھا سکتا ہے یہ روزنِ دیوار
کچھ بھید بتا سکتی ہے دیوار ہمارے
کیوں چار عناصر رہیں پابندِ شب و روز
آزاد کیے جائیں گرفتار ہمارے
کیوں شام سے ویران کِیا جاتا ہے ہم کو
کیوں بند کیے جاتے ہیں بازار ہمارے
کیا آپ سے اب سختیِ بے جا کی شکایت
جب آپ ہُوئے مالِک و مُختار ہمارے
تحسین طلب رہتے ہیں تا عُمر کہ آزَر !
پیدا ہی نہیں ہُوتے طرَف دار ہمارے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بدَن کے دشت سے جب پار ہُونے لگتے ہیں
تو خواب اُور پُراسرار ہُونے لگتے ہیں
عجب طرح ہمیں محروم کر دیا اُس نے
پرائی آگ میں سرشار ہُونے لگتے ہیں
اِس انہماک سے تکتا ہُوں اُس الاؤ کو مَیں
دھوئیں سے نقش نمودار ہُونے لگتے ہیں
ہَوائے صبح پلٹتی ہے جنگلوں کی طرَف
درخت نیند سے بے دار ہُونے لگتے ہیں
درود پڑھ کے قدم رکھا جائے دھرتی پر
تو خود ہی راستے ہموار ہُونے لگتے ہیں
وہ باغ چھؤڑ کے جاتا ہے اور اُسی لمحے
یہ رنگ پھول سے بے زار ہُونے لگتے ہیں
تمام لفظ جو ترتیب سے رکھوں آزر
خیال اپنے گرفتار ہُونے لگتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آگ لگ جائے گی اک دن مری سرشاری کو
مَیں جو دیتا ہُوں ہَوا روح کی چنگاری کو
ورنہ یہ لوگ کہاں اپنی حدوں میں رہتے
مَیں نے معقول کِیا حاشیہ برداری کو
یہ پرندے ہیں کہ درویش ہیں زندانوں کے
کچھ سمجھتے ہی نہیں امرِگرفتاری کو
اب ہمیں زندگی کرنے میں سہولت دی جائے
کھینچ لائے ہیں یہاں تک تو گراں باری کو
ایک طوفانِ بَلا خیز نے منظر بدلا
پیڑ تیّار ہُوئے رسمِ نگوں ساری کو
اُس نے وہ زہر ہَواؤں میں مِلایا ہے کہ اب
کونپلیں سَر نہ اُٹھائیں گی نموداری کو
کون کھینچے گا مِرے جسم کی زنجیر آزَر
کون آسان کرے گا مری دشواری کو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خود اپنی آگ میں سارے چراغ جلتے ہیں
یہ کس ہوَا سے ہمارے چراغ جلتے ہیں
جہاں اُترتا ہے وہ ماہتاب پانی میں
وہیں کنارے کنارے چراغ جلتے ہیں
تمام روشنی سورج سے مُستعار نہیں
کہیں کہیں تو ہمارے چراغ جلتے ہیں
تمہارا عکس ہے یا آفتاب کا پرتَو
یہ خال و خد ہیں کہ پیارے چراغ جلتے ہیں
عجیب رات اُتاری گئی محبت پر
ہماری آنکھیں تمہارے چراغ جلتے ہیں
مِری نگاہ سے روشن نِگار خانہء حُسن
مِرے لہو کے سہارے چراغ جلتے ہیں
نہ جانے کون سی منزل ہے مُنتظر آزَر
کہ رہگُذر میں ستارے ، چراغ جلتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شیشہء وقت میں اب دیکھیے کیا ٹوٹتا ہے
شام ہُوتی ہے کہ سورج کا نشہ ٹوٹتا ہے
بسترِ مرگ پہ کیوں خواہشِ نو روز کریں
نیند ٹوٹے تو کہاں خوفِ خدا ٹوٹتا ہے
کون جھانکے گا مِری روح کی گہرائی میں
کون دیکھے گا مِرے جسم میں کیا ٹوٹتا ہے
ایک ہُوتا ہے یہاں آکے لہو اور پانی
جس جگہ مِلتا ہے ساحل اُسی جا ٹوٹتا ہے
عکس جم جاتے ہیں جب برف کی صورت مجھ میں
آئنہ ہُوتا ہُوا نقش بجا ٹوٹتا ہے
سر بہ سر وقت کو تجسیم کیا ہے مَیں نے
ایک لمحے سے فقط لمحہ نُما ٹوٹتا ہے
پیکرِ حرف عجب منبعء منطق ہے میاں
سطر بن جائے تو مصرع میں خلا ٹوٹتا ہے
آسماں ٹوٹ چُکا اپنے سروں پر آزَر
اب تو آنکھوں پہ کوئی سیلِ بلا ٹوٹتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ورنہ رکنا تھی کہاں باغ میں یلغار مِری
وہ تو مَس ہوگئی اِک شاخ سے تلوار مِری
میری مٹی پہ مِرے گھر کی بناء رکھی گئی
میرے سائے سے اُٹھائی گئی دیوار مِری
مَیں کسی وقت سُبک سر تھا سبک رو بھی تھا
مجھ سے مِلتی ہے تو رو پڑتی ہے رفتار مِری
کاش وہ ساعتِ صد رنگ پلٹ کر آجائے
پیاس چمکی تھی تِری آنکھ میں اِک بار مِری
مَیں نِکلتا ہی رہوں قوسِ قُزح سے باہر
رنگ اُڑاتی رہے چشمِ شفق آثار مِری
آزر احباب کی طینت پہ گراں گذرے گی
دن بہ دن بڑھتی ہوئی قوتِ اظہار مِری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بدَن میں کون اُجالا لکیر کھینچتا ہے
کہ جیسے خاک پہ دریا لکیر کھینچتا ہے
کسی کسی کو ہے تربیتِ سخن سازی
کوئی کوئی ہے جو تازہ لکیر کھینچتا ہے
جب اور کوئی مدَد کے لیے نہیں آتا
تو عشق دشت میں تنہا لکیر کھینچتا ہے
مَیں دائرے کے تسلُط سے جب نِکلتا ہُوں
وہ اِسم پڑھ کے دوبارہ لکیر کھینچتا ہے
عجَب نہیں ہے کہ ہم خاک پر جُدا ہُو جائیں
غضَب نہیں ہے کہ لمحہ لکیر کھینچتا ہے
وہ اپنے بخت کا لکّھا بھی کاٹ سکتا تھا
جو اپنے ہاتھ پہ تازہ لکیر کھینچتا ہے
درونِ سینہءِ صد چاک سے لگے ہاتھوں
فسونِ شہرِ تمنّا لکیر کِھینچتا ہے
قبولیت کی گھڑی ہے دعا کریں آزَر
فلک پہ سُرخ ستارہ لکیر کھینچتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
