مختصر عرصے میں شہرت کی بلندیوں کو چھونے والے۔۔۔۔ نوجوان شاعر ندیم راجہ

سنے جو غور سے ، تحریر بول سکتی ہے
تُو میرے غم سے مجھے میر بول سکتی ہے
مِری زباں ،میرے پیروں کو باندھنے والو
میں چپ رہا تو یہ زنجیر بول سکتی ہے
تمھارے جھوٹ پہ سن لو اگر نہ بولا میں
میرے خمیر کی تعمیر بول سکتی ہے
غریبِ شہر کی جاگیر اُسکے بچے ہیں
امیرِ شہر یہ جاگیر بول سکتی ہے
تمھارا وصل تھا چپ کی حسین چادر میں
یہ شام ِہجر کی دلگیر بول سکتی ہے
اگر یقین ہو کامل خدا کی رحمت پر
تمھارے ہاتھ میں تقدیر بول سکتی ہے
۔۔۔۔۔۔۔۔۔۔۔۔۔۔۔۔۔۔۔۔۔
نئی ردیف نیا قافیہ تلاش کروں
تِری تلاش میں ،میں کیا سے کیا تلاش کروں
میں ہر وصال پہ دیکھوں نیا رخِ جاناں
ہر ایک بار نیا زاویہ تلاش کروں
کبھی یہ تھا ہمیں سورج تلاش کرتا تھا
اور آج کل میں فقط اک دیا تلاش کروں
۔۔۔۔۔۔۔۔۔۔۔۔۔۔۔۔۔۔۔۔
سانسیں خوشبو یار سمندر
بانہوں کے اِس پار سمندر
پا نی پانی ہو جاؤں گا
کر نہ دے انکار سمندر
اک پتھر کو لے ڈوبے گا
آخر تیرا پیار سمندر
لوگوں کا مل کر سوچیں گے
میں ، چندا ، اشجار سمندر
میری پلکوں میں ٹھہرا ہے
صدیوں کا بیمار سمندر
کربل آخر کیوں نہ پہنچا
بے وقعت ، بے کار سمندر
میری آنکھوں میں وہ جیسے
اک دریا کے پار سمندر
اتنے گہرے کیوں ہوتے ہیں
غم ، دھوکے ، اشعار سمندر
۔۔۔۔۔۔۔۔۔۔۔۔۔۔۔۔۔۔
شکستہ خواب ، بکھرتے خیال دے مارے
زمین پر ترے سارے ملال دے مارے
کوئی جواب وہ دینے سے جب رہا قاصِر
تو میرے منہ پہ ، مِرے سب سوال دے مارے
میں آسماں سے ، شکایت کروں تو گستاخی
بھلے وہ ساری زمیں کے وبال دے مارے
نکلنا شہر سے تیرے وہ یاد آتا ہے
کبھی جو موج کو دریا اُچھال دے مارے
غمِ جہاں سے میں زندہ نکل بھی آؤں تو
تری نظر کو ملا ، جو کمال دے مارے
کروں جو بات جہاں کے حسین چہروں کی
بڑے غرور سے ، اپنی مثال دے مارے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دل و نگاہ سے آگے کہیں پہ جا کے رکا
مکینِ ذات کا عنواں مکیں پہ جا کے رکا
فلک پہ جا کے رکی وہ دعا جو مانگی تھی
اور اِضطراب تھا دل کی زمیں پہ جا کے رکا
مرے لبوں پہ رواں تشنگی کا دریا تھا
جو احترام سے تیری جبیں پہ جا کے رکا
نشانیاں مجھے یاد آ گئیں کچھ اپنوں کی
وہ ہاتھ رینگتا جو آستیں پہ جا کے رکا
وہ جس گلی میں مری دھڑکنیں بھی رکتی ہیں
نا جانے چاند کیوں آخر وہیںپہ جا کے رکا
جو انجمن میں چلا قافلہ نگاہوں کا
ادھر اُدھر نہ رکا اُس حسیں پہ جا کے رکا
۔۔۔۔۔۔۔۔۔۔۔۔۔۔۔۔۔۔۔
یہ تیری آنکھ میں جو بھی ہے پانی پھینک دریا میں
یہ پانی تھا ہی دریا کی نشانی پھینک دریا میں
میںہر اک مسئلے میں انتہا رکھنے کا عادی ہوں
جو کرنی ہے محبت درمیانی پھینک دریا میں
عمل کے ساتھ کی ہے دل سے جو بھی وہ دکھا مجھ کو
عبادت جو رکھی ہے منہ زبانی پھینک دریا میں
محبت ،نعمتیں ، خوشیاں ، سہولت بھیج خشکی پر
عداوت ، مفلسی ، غم ، آسمانی پھینک دریا میں
سمندر کا رویہ بھی اگر صحرا کے جیسا ہے
سمندر کو اٹھا کر دل کے جانی پھینک دریا میں
سنا اپنی بہاروں ، بارشوں ، خوشبو ، اجالوں کا
میری اوقات کیا ؟ میری کہانی پھینک دریا میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کچھ موتی بے تاب تھے میرے بستے میں
بابا کے کچھ خواب تھے میرے بستے میں
ماں نے بستہ سوچوں سے بھر ڈالا تھا
ماں کے بھی اعصاب تھے میرے بستے میں
کُوڑا پھینکنے والو سے بھی کرنا پیار
ایسے کچھ آداب تھے میرے بستے میں
غم کے ساحل دور تلک نا دِکھتے تھے
خوشیوں کے گرداب تھے میرے بستے میں
کاپی پنسل اب تک بھیگی رہتی ھے
ایسے کچھ سیلاب تھے میرے بستے میں
۔۔۔۔۔۔۔۔۔۔۔۔۔۔۔۔۔۔۔
لکھی ہےجب تک یہ زندگانی سنبھالتا ہے
مری مکانی ، وہ لا مکانی سنبھالتا ہے
یہ میں ہوا ہوں تمہاری خاطر نڈھال ایسے
وگرنہ حاکم تو حکمرانی سنبھالتا ہے
وہ تیری آنکھوں کو تیری نیندیں سنبھالتی ہیں
یہ میری آنکھیں بکھرتا پانی سنبھالتا ہے
کوئی تو کردار پھینکتا ہےگلی سے باہر
کوئی اُٹھا کر مری کہانی سنبھالتا ہے
کہ جس طرح سے مجھے سنبھالا ہےآپ میں نے
کوئی کسی کو یوں دل کے جانی سنبھالتا ہے؟
جو ایک بوڑھا سنبھالتا ہے کسی کا بچپن
وہ اِک توقع ، وہ اِک جوانی سنبھالتا ہے