انڈین فضائیہ نے دعویٰ کیا ہے کہ بدھ کی صبح پاکستان کی جانب سے انڈین عسکری تنصیبات کو نشانہ بنانے کی کوشش کی گئی تھی اور اس کے بعد ہونے والی لڑائی میں ایک پاکستانی ایف 16 طیارہ بھی گرایا گیا ہے۔جمعرات کی شام انڈین ایئر وائس مارشل کپور نے پریس کانفرنس سے خطاب میں بتایا کہ یہ طیارہ ایل او سی کے پار پاکستان کے زیرِ انتظام کشمیر کی حدود میں گرا تھا۔ان کا کہنا تھا کہ پاکستان کی جانب سے پائلٹس کی تعداد اور طیاروں کے حوالے سے ابتدا میں غلط معلومات دی گئیں۔انڈین ایئر وائس مارشل کا یہ بھی کہنا تھا کہ پاکستان کی جانب سے کھلے علاقے میں نہیں بلکہ انڈیا کی ملٹری تنصیبات کو نشانہ بنانے کی کوشش کی گئی تھی۔ انھوں نے کہا کہ فارمیشن کمپاؤنڈ میں ہتھیار پھینکے گئے تاہم وہ کوئی بڑا نقصان نہیں پہنچا سکے۔مگر وہ اس بارے میں میڈیا کو کوئی خاطر خواہ ثبوت نہ دے سکے۔ انڈین حکام نے پاکستان کی جانب سے پائلٹ کی رہائی کے اعلان کا خیرمقدم کیا۔
تازہ ترین