نیو یارک (آن لائن)امریکہ کے فیڈرل ریزرو بورڈ اور نیو یارک اسٹیٹ ڈیپارٹمنٹ آف فائینانشل سروسزنے منی لانڈرنگ کے الزام پر نیشنل بینک آف پاکستان پر 55 ملین ڈالرز کا جرمانہ عائد کر دیا۔ فیڈرل ریزرو بورڈ کی جانب سے 20 ملین ڈالر جبکہ نیو یارک اسٹیٹ ڈیپارٹمنٹ آف فائینانشل سروسز کی جانب سے 35 ملین ڈالر کا جرمانہ عائد کیا گیا ہے۔ تفصیلات کے مطابق نیو یارک اسٹیٹ ڈیپارٹمنٹ آف فائینانشل سروسز کی جانب سے ایک ٹوئیٹر پیغام میں بتایا گیا کہ نیشنل بینک نے منی لانڈرنگ ضوابط کی خلاف ورزی پر 35 ملین ڈالر دینے کی حامی بھری ہے۔
#New: #NYDFS Superintendent of Financial Services Adrienne A. Harris announced today that the National Bank of Pakistan and its NY branch have agreed to pay $35M. Read More: https://t.co/jPe8saRL0y.
— NYDFS (@NYDFS) February 24, 2022
فیڈرل ریزرو بورڈ کے فیصلے کے مطابق انسداد منی لانڈرنگ کے ضوابط میں خلاف ورزی پر نیشنل بینک کو20.4 ملین ڈالرز کا جرمانہ ادا کرنا پڑے گا۔ فیڈرل ریزرو بورڈ کی جانب سے جاری رپورٹ میں لکھا گیا ہے کہ 14 مارچ 2016 کو نیشنل بینک آف پاکستان اور نیویارک میں اس کی برانچ نے ریزرو بینک اور نیو یارک اسٹیٹ ڈیپارٹمنٹ آف فائینانشل سرورس کے ساتھ منی لانڈرنگ کو روکنے کے پروگرام میں خامیوں کو دور کرنے کے لیے تحریری معاہدہ کیا تھا۔فیصلے میں کہا گیا کہ نیشنل بینک کی جانب سے معاہدے کی تمام شقوں کی خلاف ورزی کی گئی جس کے بعد جرمانے کا فیصلہ کیا گیا۔
