پاک افغان سرحد کو دوبارہ غیر معینہ مدت کیلئے بند کر دیا گیا

دو روز کیلئے سرحد کھولے جانے کے دوران چوبیس ہزار افغانی واپس گئے ، نو سو سے زائد افراد پاکستان میں داخل ہوئے
لنڈی کوتل (شاہد شنواری سے) پاک افغان سرحد کو ایک بار پھر غیرمعینہ مدت کے لیے بند کر دیا گیا ، دو روز کے دوران چوبیس ہزار سے زائد افراد افغانستان گئے ۔ پاکستان کا جذبہ خیرسگالی ، افغان سرحد پر موجود ہزاروں افراد کی مشکلات کے پیش نظر حکومت پاکستان نے اٹھارہ روز بندش کے بعد سرحد دو روز کے لیے کھولی تھی ۔ بارڈر حکام کے مطابق اس دوران چوبیس ہزار سے زائد افغان اپنے ملک گئے اور نو سو سے زائد افراد پاکستان میں داخل ہوئے ۔ سرحد پر صرف پاسپورٹ رکھنے والوں کو آمد و رفت کی اجازت دی گئی تھی تاہم تجارتی سرگرمیاں بدستور معطل ہیں ۔ دو روز مکمل ہونے کے بعد پاک افغان سرحد کو تاحکم ثانی بند کر دیا گیا ۔