ایران کے سپریم لیڈر آیت اللہ سید علی خامنہ ای نے کہا ہے کہ ایران جتنا چاہے اتنا تیل برآمد کرسکتا ہے اور اس بارے میں کسی پابندی کو خاطر میں نہیں لایا جائے گا۔ ٹوئٹر سائٹ پر ایک بیان میں رہبرِ اعلیٰ نے کہا ہے کہ امریکہ کی جانب سے ایران کے تیل کی فروخت پر پابندی لگانے کی کوششوں کا کوئی نتیجہ نہیں نکلے گا۔امریکہ نے رواں ہفتے اعلان کیا تھا کہ وہ ان تمام ملکوں کو ایران سے تیل کی خریداری کے لیے دی جانے والی چھوٹ آئندہ ہفتے ختم کردے گا جنہیں ایرانی تیل کی درآمد پر عائد پابندیوں سے استثنیٰ دیا گیا تھا۔امریکی حکام کا کہناہے کہ استثنیٰ واپس لینے کا مقصد ایرانی تیل کی بین الاقوامی منڈیوں میں فروخت محدود کرکے تہران پر دباؤ بڑھانا ہے تاکہ وہ مشرقِ وسطیٰ سے متعلق اپنی پالیسیاں تبدیل کرے۔امریکہ کے اس اعلان کے بعد عالمی منڈی میں تیل کی قیمتیں منگل کو گزشتہ چھ ماہ کی بلند ترین سطح پر پہنچ گئی تھیں۔امریکہ نے اپنے اتحادیوں کو ایرانی تیل کے بجائے متبادل ذرائع سے تیل حاصل کرنے کی ترغیب دی ہے اور کہا ہے کہ وہ توانائی کے متبادل ذرائع کے حصول میں اُن کے ساتھ بھرپور تعاون کرے گا۔
U.S.'s efforts to boycott the sale of Iran's oil won't get them anywhere. We will export our oil as much as we need and we intend. They should know that their hostile measure won't be left without a response. Iranian nation does not sit idle in the face of animosities. pic.twitter.com/9MrphK4nwL
— Khamenei.ir (@khamenei_ir) April 24, 2019
