بھارتی میڈیا رپورٹس کے مطابق بالی ووڈ کے معروف فلم ساز کرن جوہر مبینہ طور پر سلمان خان کے بعد گینگسٹر لارنس بشنوئی کے بھتہ خوری کے اگلے ہدف کی فہرست میں شامل تھے۔
میڈیا رپورٹس کے مطابق بشنوئی گینگ کے ایک مبینہ رکن سدھیش کامبلے عرف مہاکل نے پنجابی گلوکار سدھو موسے والا کے قتل کی تحقیقات کرنے والے تفتیش کاروں کے سامنے اعتراف جرم کیا ہے کہ وہ کرن جوہر سے دھمکی آمیز خط کے ذریعے 5 کروڑ روپے کا بھتہ وصول کرنے کا ارادہ رکھتے تھے۔
موسےوالا کے قتل کیس میں گرفتار سنتوش جادھو کے قریبی ساتھی کامبلے نےتفتیش کے دوران یہ دعویٰ کیا کہ بشنوئی کے گینگ نے مبینہ طور پر کرن کو دھمکی دے کر 5 کروڑ روپے بٹورنے کا منصوبہ بنایا تھا۔ تاہم ایک سینئر پولیس افسر نے خبردار کیا ہے کہ ان دعوؤں کی ابھی تک تصدیق نہیں ہو سکی ہے۔
رپورٹس کےمطابق کامبلے نے پولیس کو موسے والا قتل کی سازش اور بشنوئی گینگ کے مستقبل کے منصوبوں کے بارے میں بھی آگاہ کیا۔
