بھارت میں بھی تبدیلی کی لہر چل پڑی ،کانگریس کی قیادت ’’راہول گاندھی ‘‘سنبھالیں گے

نئی دہلی(مانیٹرنگ ڈیسک)بھارتی کی بڑی سیاسی جماعت ’’کانگریس‘‘ کی قیادت میں تبدیلی کا فیصلہ ہو گیا ،رواں ماہ کانگریس کی صدر سونیا گاندھی عہدے سے سبکدوش ہو کر اپنے بیٹے راہول گاندھی کو صدارت سونپ دیں گی ۔بھارتی نجی چینل ’’زی نیوز ‘‘ کے مطابق رواں ماہ راہول گاندھی کو پارٹی کی قیادت سونپ دی جائے گی ،2014ء میں لوک سبھا کے انتخابات میں بدترین شکست کے بعد سونیا گاندھی نے بیان دیا تھا کہ کانگریس تنظیم میں جلد بڑی تبدیلیاں ہوں گے، لیکن یہ تبدیلی مسلسل ٹلتی رہی، اب اسمبلی انتخابات میں شکست کے بعد اس بات کا امکان غالب ہے کہ راہول کو پارٹی قیادت کی ذمہ داری رواں ماہ ہی سونپ دی جائے گی، چونکہ سونیا گاندھی سے ملاقات کرنے والے پارٹی لیڈر بھی یہ اشارہ دے رہے ہیں کہ تبدیلی کی تمام تیاریاں مکمل ہو چکی جبکہ ملک گیر سطح پر بھی کانگریس میں وسیع پیمانے پر اکھاڑ پچھاڑ ہو گی ۔نجی ٹی وی نے دعوی کیا ہے کہ کانگریس میں زیادہ تر عہدوں پر ’’نئے اور نوجوان چہروں ‘‘ کو آگے لانے کا فیصلہ کیا گیا ہے ۔واضح رہے کہ 2014ء کے لوک سبھا انتخابات کے بعد پہلی بار کانگریس کو 543 رکنی ایوان میں محض 44 سیٹیں ملی تھیں۔